Ang Pahayagan

Sa gitna ng matinding reklamo ng mga residente ng Subic hinggil sa kakulangan ng suplay ng tubig, inihayag ang pag-upo ng bagong pamunuan ng PrimeWater sa bayan kasabay ng pangakong aayusin at pagagandahin ang serbisyo.

Maganda itong pakinggan. Ngunit para sa maraming consumer na ilang taon nang nagtitiis sa problema sa tubig, natural lamang na magtanong: bagong simula ba ito o panibagong kabanata lamang ng lumang kuwento?

Kung tutuusin, ang sentro ng usapin ay hindi lamang kung sino ang nakaupo sa pamunuan kundi kung sino pa rin ang may kontrol sa operasyon at pananagutan sa serbisyo. Kung nananatiling PrimeWater ang may hawak sa sistema, hindi maiiwasang isipin ng ilan na maaaring pagpapalit lamang ito ng mga tao sa loob ng organisasyon habang nananatili ang parehong istruktura ng pamamahala.

Sa pananaw ng mga mamamayan, hindi sapat ang mga pangako. Mas mahalaga ang kongkretong resulta: magkakaroon ba ng sapat na tubig? Mawawala ba ang matagal nang rotational interruptions? Bibilis ba ang pagtugon sa mga reklamo? At higit sa lahat, may pananagutan ba kung muling mabigo ang serbisyo?

Ang tanong ng ilan kung may kontrol pa rin ang pamilya Villar sa PrimeWater ay isang usaping dapat sagutin nang malinaw ng kumpanya mismo. Bilang isang pribadong korporasyon, mahalagang maging bukas ito sa publiko tungkol sa istruktura ng pamamahala at kung paano isinasagawa ang mga desisyon na direktang nakaaapekto sa milyun-milyong consumer.

Ngunit sa dulo, marahil ay hindi na mahalaga sa mga residente kung sino ang nasa likod ng kumpanya. Ang mahalaga ay kung may tubig na lumalabas sa kanilang gripo araw-araw.

Dahil para sa isang pamilyang ilang taon nang bumabangon nang madaling-araw upang mag-ipon ng tubig, hindi sapat ang pagpapalit ng liderato. Ang tunay na sukatan ng pagbabago ay hindi nasa press conference o turnover ceremony—nasa gripo ito ng bawat tahanan.

Hangga’t hindi nararamdaman ng mga mamamayan ang ipinapangakong pagbuti ng serbisyo, mananatiling buhay ang tanong: tunay bang pagbabago ito, o umiikot lamang ang trumpo habang pareho pa rin ang nagpapaikot?