Ang Pahayagan

Ni: MITCH C. SANTOS

SUBIC BAY FREEPORT — Isang makulay at makabuluhang selebrasyon para sa mga ina ang hatid ng Ayala Malls Harbor Point sa pamamagitan ng kakaibang “make-your-own bouquet” at pottery experience na inorganisa ng April Mora Creative.

Sa naturang aktibidad, nagkaroon ng pagkakataon ang mga kalahok na gumawa ng sarili nilang bouquet bilang simbolo ng pagmamahal at pasasalamat sa kanilang mga ina. Tampok dito ang iba’t ibang bulaklak at malikhaing disenyo na tunay na sumasalamin sa lambing at pag-aaruga ng isang ina.

Ayon sa mga organizer, layunin ng aktibidad na maipadama sa mga nanay kung gaano sila kahalaga sa kanilang pamilya at komunidad.

Bukod sa flower arrangement activity, dinayo rin ng mga bisita ang pottery workshop kung saan natutunan nilang humubog ng mga palayok at iba pang likhang-sining gamit ang kanilang sariling mga kamay. Bawat ikot ng pottery wheel ay naging simbolo ng pagmamahal, tiyaga, at alaalang hindi kumukupas.

Naging espesyal din ang programa dahil sa masayang samahan ng mga kalahok, kabilang ang mga kabataan at pamilya na sabay-sabay na nakiisa sa malikhaing gawain.

Sa pamamagitan ng mga aktibidad na ito, muling pinatunayan ng Ayala Malls Harbor Point ang kanilang layunin na makapagbigay hindi lamang ng shopping experience kundi pati na rin ng mga makabuluhang alaala para sa bawat pamilyang Pilipino.