OLONGAPO CITY — Kinilala ng Schools Division Office (SDO) ng Department of Education (DepEd) Olongapo ang Subic Bay Metropolitan Authority (SBMA) Labor Department dahil sa mga programa nitong sumusuporta sa pagpapaunlad ng kasanayan at paghahanda ng mga mag-aaral sa pagtatrabaho.

Iginawad ang pagkilala noong Okt. 16, 2026, sa isang seremonya sa SMX Convention Center sa SM Olongapo City.

Kabilang sa mga pangunahing kontribusyon ng SBMA Labor Department ang pagpapatibay ng Implementing Rules and Regulations (IRR) ng Work Immersion Program noong 2017 at ang paglalabas ng isang board resolution na naghihikayat sa mga kompanya sa Subic Bay Freeport Zone na tumanggap ng mga senior high school (SHS) students para sa kanilang work immersion.

Sa pamamagitan ng programa, nabibigyan ang mga mag-aaral ng pagkakataong magkaroon ng aktuwal na karanasan sa lugar ng trabaho bilang paghahanda sa kanilang pagpasok sa labor force.

Ipinatupad din ng SBMA Labor Department ang Regional Oratorical Activity (ROA), isang taunang patimpalak na naglalayong malinang ang kumpiyansa at kasanayan ng mga mag-aaral sa pagsasalita sa publiko. Nagsisilbi itong direktang paghahanda para sa mga mag-aaral na nagnanais pumasok sa mga industriya tulad ng Call Center at Business Process Outsourcing (BPO).

Pinagsasama naman ng Labor Matching Congress ang mga locator sa Subic Bay Freeport, mga kinatawan ng mga institusyong pang-edukasyon at iba pang stakeholder upang maitugma ang mga kasanayan ng mga mag-aaral na magtatapos sa pangangailangan ng mga industriya at mga bakanteng trabaho.

Ang SBMA Labor Department ay nasa ilalim ng pangangasiwa ni Atty. Melvin L. Varias, acting deputy administrator ng SBMA Legal Affairs Group, sa tulong ng pamunuan ng departamento na pinangungunahan ni Rommel M. Aquino at ng hepe nitong si Amy L. Dimacali.

Ayon sa ahensya, patuloy itong bubuo ng mga programa at inisyatibo upang mapalawak ang mga oportunidad para sa mga mag-aaral na naghahanda sa pagpasok sa mundo ng trabaho. (Ulat at mga larawang kuha ni Augusto Jorge Lacasad Jr. para sa Ang Pahayagan)