OLONGAPO CITY– Inilunsad ng City Health Office ang ikalawang taon ng Online Healthy Baby Contest na may temang “Malusog na Chikiting, Kinabukasang Kay Galing” nitong Martes, Oktubre 13, 2026, sa SM City Central.

Layunin ng programa na palakasin ang kamalayan ng mga magulang at tagapag-alaga tungkol sa wastong nutrisyon, pangangalaga sa kalusugan, at tamang pagpapakain sa mga sanggol at maliliit na bata.

Bahagi rin ang paligsahan ng pagsusulong ng Philippine Plan of Action for Nutrition (PPAN) 2023–2028 at Philippine Development Plan (PDP) 2023–2028, na nakatuon sa paglaban sa gutom at pagbabawas ng malnutrisyon sa bansa.

Binigyang-diin ng City Health Office ang kahalagahan ng sapat at wastong nutrisyon sa unang 1,000 araw ng buhay ng isang bata, na itinuturing na kritikal na yugto para sa paglaki at pag-unlad nito.

Kabilang sa mga isinusulong ng programa ang eksklusibong pagpapasuso, napapanahong pagbibigay ng angkop na karagdagang pagkain, regular na pagsusuri sa kalusugan, pagbabakuna, at pagpapanatili ng kalinisan.

Sa pamamagitan ng online na paligsahan, layon din ng pamahalaang lungsod na mahikayat ang mas maraming pamilya na makilahok sa mga programang pangnutrisyon habang nagbibigay ng mas malawak at madaling maabot na plataporma para sa pagpapalaganap ng kaalaman tungkol sa kalusugan ng mga bata.

Inaasahan ding mapalakas ng inisyatiba ang pagtutulungan ng mga pamilya, komunidad, at lokal na pamahalaan upang matiyak ang mas malusog na kinabukasan ng mga batang Olongapeño. (Ulat ni Mitch C. Santos para sa Ang Pahayagan)