Ang Pahayagan

Itinutulak ng Department of Trade and Industry (DTI) ang pansamantalang moratorium sa paniningil ng toll para sa transportasyon ng mga pangunahing pangangailangan at prime commodities, gayundin ang pagsuspinde sa bahagi ng pamahalaan sa port fees, upang mapigilan ang posibleng pagtaas ng presyo sa gitna ng nagpapatuloy na sigalot sa Middle East.

Inirekomenda ni Trade Secretary Cristina Roque ang “pansamantalang moratorium sa toll fee para sa mga cargo at delivery vehicle na nagdadala ng basic necessities at prime commodities (BNPCs) na dumaraan sa mga pangunahing expressway.”

Ayon sa kanya, inirerekomenda rin ng DTI ang pagsuspinde sa bahagi ng pamahalaan sa port at cargo logistics handling costs na ipinapataw ng Philippine Ports Authority, Cebu Ports Authority, at Subic Bay Metropolitan Authority.

Batay ang mga rekomendasyong ito sa inaasahan ng ahensya na maaaring magkaroon ng pagtaas sa presyo ng mga bilihin dahil sa pagmahal ng gastos sa transportasyon habang tumataas ang presyo ng langis.

Upang matiyak na mananatiling makatwiran ang presyo ng mga BNPC, sinabi niya na pinalakas ng DTI ang mga field office nito upang paigtingin ang monitoring sa presyo at suplay ng mga produkto sa buong bansa.

Nakatakdang magpulong bukas ang National Price Coordinating Council upang talakayin ang mga hakbang na makatutulong upang mabawasan ang epekto ng sigalot sa Middle East.