Ang Pahayagan

LUNGSOD NG SAN FERNANDO, Pampanga — Muling iigting ang saya sa Central Luzon sa pagdating ng EuroXtreme Circus, isang internasyonal na palabas na tampok ang world-class extreme live entertainment, na ngayo’y mapapanood na sa Pampanga.

Pormal na nagbukas ang EuroXtreme Circus noong Enero 28 sa Robinsons Starmills, at tatagal hanggang Pebrero 22, na nagbibigay sa mga Kapampangan at karatig-lalawigan ng pambihirang pagkakataong masaksihan ang de-kalibreng circus performances at high-impact stunts na bihirang mapanood sa bansa.

Pinagsasama ng produksyon ang makalumang sining ng sirko at makabagong extreme acts sa pamamagitan ng mga internationally acclaimed performers. Tampok sa palabas ang mga komedyanteng clown, mapanganib na stunt performances, at visual spectacles na tiyak magpapahanga sa manonood.

Kabilang sa mga inaabangang tampok ang Wheel of Suspense, kung saan sinusubok ng mga performer ang kanilang tapang at balanse sa matataas na estruktura; ang Globe of Terror, na nagpapakita ng husay ng mga motorcycle rider sa loob ng isang bakal na globo; ang Flying Trapeze, na sumasalamin sa klasikong aerial artistry; at ang FMX Stunts, na nag-aalok ng mga gravity-defying na motorsiklo trick.

Ang EuroXtreme Circus ay inihahandog ng Art Box Entertainment, sa pangunguna nina Executive Producer at Touring Director Kenneth Lee at President Kimberly Lee. Ang palabas ay pagpapatuloy ng makasaysayang ambag ng pamilya Lee sa industriya ng aliwan, na nagsimula sa yumaong si Paul L. B. Lee, na nagdala ng Royal London Circus sa Pilipinas mahigit tatlong dekada na ang nakalilipas.

Layunin ng grupo na mailapit ang world-class entertainment sa mas maraming Pilipino, partikular sa mga lugar sa labas ng pangunahing urban centers. Matapos ang matagumpay na mga pagtatanghal sa Mindanao at Visayas, ang Pampanga ang pinakabagong destinasyon ng kanilang extreme circus tour.

Itinuturing ang EuroXtreme Circus bilang isa sa mga pangunahing live entertainment attractions sa rehiyon ngayong taon, na angkop para sa mga pamilya, mahilig sa matitinding palabas, at mga tagasubaybay ng de-kalibreng live performances.

Iskedyul ng Palabas

Ang EuroXtreme Circus ay mapapanood mula Enero 28 hanggang Pebrero 22 sa Robinsons Starmills, San Fernando, Pampanga.

Bukas ang mga palabas araw-araw maliban tuwing Lunes.

Weekdays: 8:00 ng gabi

Weekends: 4:30 ng hapon at 8:00 ng gabi

Presyo ng Ticket

Bronze: ₱650

Silver: ₱1,100

Gold: ₱1,600

VIP: ₱2,200

Premium VIP: ₱3,200

Maaaring bumili ng tiket online sa artboxentertainment.com. (Ulat para sa Ang Pahayagan /: MITCH C. SANTOS)