Ang Pahayagan

ZAMBALES– Pormal nang nabuklod ang Naval Operating Base (NOB) Press Corps, isang media team na magsisilbing mahalagang tulay ng komunikasyon tungo sa mahusay na pag-unawa ng publiko sa mga kaganapan sa maritime security at mga isyu sa pambansang depensa dito sa Zambales.

Ang inisyatiba ay naisakutuparan sa pagtutulungan ng iba’t ibang yunit ng Philippine Navy tulad ng Philippine Fleet (PF), Fleet-Marine Ready Force (FMRF), at Naval Education, Training, and Doctrine Command (NETDC), ayon kay Director Cdr. Randy Garbo ng Fleet Public Affairs Office.

Nagtulong ang FPAO at ang Office of the Assistant Chief of Fleet Staff for Civil-Military Operations (F7), upang mailunsad ang induction ng NOB Press Corps noong Miyerkules, Marso 26 sa Subic Gym, sa munisipalidad ng Subic, Zambales.

Naging katanggap-tanggap naman ang suporta ng mga Zambales-based media practitioners mula sa Olongapo Express, Brigada News, K5 News FM, Radyo Natin Iba, Freeport Insider, Abante Radio, iOrbit News, CL Business Week, Punto Central Luzon, Pillars Central, Christian Herald, Christian Chronicle, Subic Sentral at MBC-DZRH.

Nagsilbing inducting officer si Cdr. Dennis Resuello, kung saan pinuri niya ang pinagsamang inisyatiba nina F7 Lt. Cdr. Divino Jore, former FPAO Director Lt. Giovanni Badidles, at NOB-Subic Press Corps President Jerry Uy upang mabuo ang organisasyon.

“This initiative strengthens the relationship between the PF and the media, promoting a cooperative environment for the timely, accurate, and transparent dissemination of information on the Fleet’s and other Philippine Navy units’ activities, accomplishments, and initiatives,” pahayag ni Resuello sa kanyang mensahe.

📸  Philippine Fleet