Ang Pahayagan

SUBIC BAY FREEPORT — Muling isinagawa ng Subic Bay Metropolitan Authority (SBMA) ang kanyang regular na “Talakayan sa Freeport” nitong Miyerkules, Pebrero 11, sa Terrace Hotel ng Subic Bay Freeport Zone (SBFZ) .

Layunin ng programa na ihayag sa publiko ang mga nagawa at mga nakalatag na plano ni SBMA Chairman at Administrator Eduardo L. Aliño sa loob ng dalawang taon ng kanyang panunungkulan. 

Tinalakay sa forum ang mga inisyatiba ng ahensya sa larangan ng pamumuhunan, turismo, imprastraktura, at pagpapalakas ng serbisyo upang higit pang mapaunlad ang ekonomiya ng Freeport at mga karatig-lugar. Nagbigay rin ng ulat ang iba’t ibang opisyal ng SBMA hinggil sa kani-kanilang proyekto at programa. 

Isa sa mga tampok na tagapagsalita si SBMA Tourism Manager Mary Jamelle A. Camba, na naglatag ng detalye tungkol sa flagship project ni First Lady Atty. Liza Araneta Marcos na tinatawag na “LAB FOR ALL.” Ipinaliwanag ang layunin ng programa at ang inaasahang benepisyo nito sa mga komunidad. 

Paglilinaw sa Isyu ng Media Bypass

Tinalakay din ng SBMA ang kontrobersya kaugnay ng magkasunod na raid na isinagawa kamakailan sa loob ng Freeport area, na hindi agad naibalita sa lokal na media. 

– Koordinasyon sa Law Enforcement – Ipinaliwanag na ang mga operasyon ay lehitimong aksyon ng Criminal Investigation and Detection Group (CIDG) at hindi dumaan sa direktang koordinasyon sa SBMA. 

– Operational Security – Ang hindi paglalabas ng impormasyon sa media ay bunsod ng pangangailangan na mapanatili ang seguridad ng operasyon at hindi makompromiso ang imbestigasyon. 

– Transparency – Iginiit ng SBMA na handa silang magbigay ng impormasyon sa tamang oras at proseso, kapag pinahihintulutan na ng mga awtoridad. 

Ayon kay Armina Belleza C. Llamas, OIC Deputy Administrator for Corporate Communications, walang intensyon ang SBMA na iwasan o i-bypass ang lokal na media. Ang sitwasyon ay bunga aniya ng operational protocols at hindi ng kawalan ng respeto sa mga mamamahayag. 

Ang “Talakayan sa Freeport” ay bahagi ng patuloy na pagsisikap ng SBMA na maging bukas at transparent sa publiko sa pamamagitan ng pagbabahagi ng impormasyon ukol sa mga programa at direksiyong tinatahak ng ahensya para sa mas maunlad na Subic Bay Freeport Zone. (MITCH C. SANTOS)