Ang Pahayagan

Nanindigan si Senator Alan Peter Cayetano na dapat manatiling patas ang Senado sa impeachment case laban kay Vice President Sara Duterte kahit na isa itong prosesong may bahid ng politika.

Sa isang panayam, ipinaalala ni Cayetano na bilang impeachment court, may tungkulin ang Senado na sumunod sa Konstitusyon at mga batas.

“Mag-oath ka ulit as a senator-judge, at ang oath mo roon ay to follow the Constitution and to obey the laws, which includes neutrality,” sabi niya.

“Totoong it’s a political process, but it’s not a political process in the sense na walang element of justice and fairness. Y’ung neutrality is still there,” dagdag niya.

Pinaalalahanan din niya ang media na huwag pilitin ang mga senador na magpahayag ng opinyon sa impeachment case.

“Once na judge ka, hindi ka [dapat] magbigay ng opinion. I’d advise against asking them [other senators] if they’re for or against the impeachment,”  sabi niya.

Nilinaw rin ni Cayetano na ayon sa Konstitusyon, kapag naipasa na ng House of Representatives ang isang impeachment case sa Senado, obligasyon ng Senado na isagawa ang paglilitis.

“Even if you ask me, do you want the impeachment or hindi, it’s not a matter of if you want anymore. Once final na ang Congress dito, wala nang choice ang Senate,” aniya.

Binigyang diin din ni Cayetano na dapat isaalang-alang ang tamang timing ng impeachment upang hindi mapabayaan ang iba pang mahahalagang isyu ng bansa.

“We’re still a nation in mourning over the deportation case of former President Duterte, nagluluksa pa ang marami. Then, may mga isyu pa tayo tulad nitong tulay, itong ‘ghost’ students sa DepEd program, at mga budget concerns sa Supreme Court. Marami tayong problema,” sabi niya.

Bagamat may mga pangamba ang prosekusyon sa impeachment, iginiit ni Cayetano na may sapat na oras para mapangalagaan ang ebidensya, kaya hindi kailangang apurahin ang proseso.

“Yes, may concerns ang prosecution but those concerns can be addressed by them to preserve the evidence. Kaya nila yan. So to start [the impeachment] in June or July would not cause any irreparable damage. But it will help the nation take these issues in stride,” sabi niya. (PR)