Ang Pahayagan

Nakopo ni Efren Reyes ang open-Professional category ng ginanap na Lumba Tamo Ha road bike race, isa sa tampok na event ng Dinamulag Mango Festival dito sa lalawigang Zambales.

Ang Lumba Tamo Ha ay hatid ng Provincial Government of Zambales sa pamumuno ni Gobernador Hermogenes Ebdane Jr.,  Zambales Sports and Youth Development Office, Zambales Tourism Office, at ng Pocari Sweat bilang official hydration partner ng naturang karera.

Tinawid ng indibidual rider ng Dagupan City na si Reyes ang finish line matapos nitong kumawala mula sa 10-man break-away lead group ng 195-kilometrong lakbayin na nag-umpisa sa bayan ng Subic hanggang Sta. Cruz at bumalik sa kabisera ng lalawigan na Iba.

Pumangalawa sa kategorya si Marcelo Felipe ng 7-eleven Cliqq Air21 By Road Bike Philippines na baghagyang naka-ungos kay Ronald Oranza ng Philippine Navy Standard Insurance.

Kabilang din sa grupo ang mga siklista ang pumang-apat na si Janreck Carcueba, (7-eleven), 5th Place – Ronnilan Quita (Go for Gold), 6th Place – Ismael Gorospe Jr. (7-eleven), 7th Place – Leonardo Valdez Jr. (Team Vantage), 8th Place – Rench Michael Bondoc (7-eleven), 9th Place – Johnel Carcueva (Go for Gold), at 10th Place – Ian Timbang (Teambang).

Nagkaroon din ng espesyal na papremyo para sa best team kung saan itinanghal na kampeon ang 7-eleven Cliqq Air21 By Road Bike Philippines, sinundan ito ng Go for Gold sa ikalawang puwesto habang 3rd Place naman ang Philippine Navy Standard Insurance.

Ang open elite category naman ay napalunan nina Anselmo Lazatin at ka-team nito na si Jesus Garcia na Exodus Cycling Team habang pumangatlo si Rheo Diaz ng koponang El Kapitan. Sa kategoryang open amateur ay napanalunan ng Pangasiniseng si  Jerry Yhan Vinluan (Team 3115); 2nd Place si Ruzel Agapito ng Nueve Ecija (Batang Placido) at 3rd Place naman si Khim Jhanrick Manzano ng Pangasinan (Dandex Multi Sport).